საქართველოს ყველაზე ტიტულოვანი კლუბი “დინამო თბილისი” კიდევ ერთ სეზონს გაატარებს ევროტურნირის გარეშე. ამჯერად დედაქალაქელები ესტონური “პაიდეს” წინააღდეგ ორი მატჩის ჯამში 5:4 დამარცხდა.
აჩი არველაძე საზოგადოებრივ მაუწყებელზე გადაცემა “საფეხბურთო ტაიმაუტში” იყო სტუმრად. საქართველოს ნაკრების ექსფეხბურთელმა სხვადასხვა საკითხზე ისაუბრა, მათ შორის, ქართული გუნდების ევროტურნირებზე გამოსვლაზე.
“დინამო ბათუმზე”:
“ბათუმის “დინამო” ძალიან კარგად თამაშობს და შარშანაც ღირსეულად იასპარეზა, გასულ სეზონში 3 წრე გაიარა არც ისე მარტივ მეტოქეებთან. წელსაც ყველანი ვთვლიდით, რომ ვაისის გუნდი ძალიან უხერხული მეტოქე იქნებოდა. ვფიქრობ, “დინამომ” “სლოვანს” აჯობა და გული დამწყდა ასეთი თამაშის ფონზე, რომ შემდეგ ეტაპზე ვერ გავიდნენ. შეტევაშიც და დაცვაშიც ბათუმელები უკეთ გამოიყურებოდნენ. არა მგონია, ეს წაგება გამოუცდელობის ბრალი ყოფილიყო. რაც შეეხება კუთხურის ეპიზოდს, მსგავსი ფაქტი შეგვიძლია “ბარსელონასა” და “ლივერპულის” დაპირისპირებიდან გავიხსენოთ. ესპანურ კლუბს გამოცდილებას ვერ დავუწუნებთ, მაგრამ მოხდა.”
“დინამო თბილისი”:
“მიზეზის გამონახვა ძალიან მიჭირს. პირველ თამაშში 3 გოლის გაშვება, ალბათ, მეკარესა და დაცვას უნდა დავაბრალოთ. მიუღებელია, სახლში ასეთი სუსტი გუნდისგან გაუშვა ამდენი გოლი. ადრე შეიძლებოდა მეთქვა, რომ მენეჯმენტში პრობლემები არსებობდა, თუმცა წელს ძალიან იმედიანად ვიყავი. პირველ რიგში, კახა ცხადაძის მთავარ მწვრთნელად დანიშვნის გამო. ვიცი მისი უნარები, სამწვრთნელო ხარისხი და გუნდის თამაშის ხარისხის გაუმჯობესებას ველოდი. საბოლოო ჯამში, არასტაბილური თამაშისა და შედეგების გამო კახა წავიდა გუნდიდან. ჭიაბრიშვილზეც შეგვიძლია იგივე ვთქვათ, ვიცით მისი გამოცდილება, საფეხბურთო გემოვნება და სამწვრთნელო თვისებები. გასაგებია, რომ ახლახან ჩაიბარა კლუბი, თუმცა “პაიდესთან” მარცხის გამო, ალბათ, უმწვრთნელოდაც და მწვრთნელითაც ყველა ერთად დამნაშავენი არიან. ვფიქრობ, საჭიროა ხარისხიანი ლეგიონერების ჩამოყვანა, რადგან თბილისის “დინამოა”, რომელსაც ყველანაირი პირობა გააჩნია, რომ უკეთესი ლეგიონერები ჰყავდეს. ასევე მიმაჩნია, რომ “დინამოში” საუკეთესო ქართველები უნდა თამაშობდნენ.”
კომენტარები post