“ასეთ ატმოსფეროში არასდროს მითამაშია, დღეს ბედნიერებს დაგვეძინება” – უზომოდ გახარებულმა მოთამაშეებმა მატჩის შემდეგ ასე ისაუბრეს

ევრობასკეტზე საქართველოს ნაკრებმა პირველი გამარჯვება მოიპოვა. ამ სანატრელ მოგებას ჩვენებურებმა უდიდესი ბრძოლის შემდეგ მიაღწიეს.

თურქეთის ეროვნული ნაკრები 5 ქულით, 83:88 დამარცხდა საქართველოსთან. მატჩის ბედი მეორე ოვერტაიმში გადაწყდა. მატჩის მიმდიანრეობისას მოედნიდან 5 პერსონალური ჯარიმის გამო გიორგი შერმადინი, ჩხუბის გამო კი დუდა სანაძე გაგვიგდეს. ისედაც გვაკლდა გოგა ბითაძე და თორნიკე შენგელიაც.

გამარჯვების შემდეგ ნაკრების მოთამაშეებმა კომენტარებიც გააკეთეს:

“მართლაც სასწაული იყო, გულშემატკივარი 50 წუთი არ გაჩერებულა და მადლობა მათ. ძალიან გახარებულები ვართ ამ მოგებით და წინ კიდევ ორი უმნიშვნელოვანესი მატჩი გველის. ვფიქრობ, რომ დარბაზი აუცილებლად გადაივსება. სახლში თამაში დამატებითი პასუხისმგებლობაა. ჩვენ გვინდა, რომ მაქსიმუმი გაჩვენოთ, როცა ამას ვერ ვაკეთებთ, ძალიან გვწყდება გული. წარმოიდგინეთ, გოგა და თორნიკე რომ გვყავდეს, რა მაგარი იქნებოდა. გოგა კოჭის გადასაღებად წაიყვანეს. იმედია, რომ შემდეგ მატჩში იქნება. ატმოსფერო სასწაული იყო, კიდევ ერთხელ მადლობა თქვენ”, – ამბობს გიორგი შერმადინი.

“უპირველეს ყოვლისა, ვულოცავ ქართველ ქომაგს მოგებას. ძალიან დაძაბული მატჩი იყო. გუნდმა ყველაფერი გააკეთა იმისთვის, რომ ეს შეხვედრა მოეგო. მთავარი მოტივაცია იყო ორივე მოთამაშე, რომლებიც გვაკლდნენ. კაპიტანი ტრავმიანია, მაგრამ ჩვენს გვერდითაა და მუდმივად გვეხმარება. ვფიქრობ, რომ გუნდს დავეხმარე და ეს ბიჭების დამსახურებაა. მადლობა ბიჭებს ამ ღირსეული თამაშისთვის”, – განაცხადა ბექა ბექაურმა.

“ჩემი აზრით, აქ აქცენტი გუნდზე უნდა გაკეთდეს. მაღალ დონეზე ვითამაშეთ ბოლო წუთები და ოვერტაიმი მთელმა გუნდმა. ბექა ბექაურმა მაგრად ითამაშა, მან ასეთ გარდამტეხ მომენტში მშვენივრად იასპარეზა. ყველამ ერთად უნდა ვითამაშოთ მაგრად, რათა ბერლინის საგზური მოვიპოვოთ. ერთ მომენტში თურქმა კალათბურთელმა ხელი გამკრა, განსაკუთრებული არაფერი ყოფილა. ახლა ყველაზე მაგრად გვჭირდება ამ შეხვედრის დავიწყება და ხვალინდელი დღიდან კონცენტრაცია გავაკეთოთ ბოლო ორ მატჩზე. ქომაგებმა განსაკუთრებული წვლილი შეიტანეს, მადლობა თითოეულ ადამიანს, რომლებიც მოვიდნენ და იმ წაგებების მერეც გვიქომაგეს. ისინი ჩვენ გვერდით იდგნენ, ჩვენ კი მათთვის ეს შეხვედრა მოვიგეთ”, – ასეთ იყო რატი ანდრონიკაშვილის ემოციები მატჩის შემდეგ.

“ორი ცუდი მარცხი გვქონდა. ჩემი აზრით, მთელი გუნდი შეკრული იყო. გულშემატკივრებს დიდი მადლობა მინდა გადავუხადო, ასეთ ატმოსფეროში მე არასდროს მითამაშია. ქომაგებმა გოგასა და თოკოს დანაკლისი თავის თავზე აიღეს. ყველამ მაგრად ითამაშა. ვიბრძოლეთ, ჩვენ უფრო გვინდოდა მოგება, როცა ცუდად მიგვდიოდა თამაში, ერთად ვიდექით მოედანზე და ვამხნევებდით მთელი გუნდი ერთმანეთს. მთავარია, საკუთარი თავის გჯეროდეს. როცა ვხედავ, რომ ამდენ ხალხს ჩემი სჯერა, მეც მაგრად ვთამაშობ. ხვალიდანვე მზადება უნდა დავიწყოთ, რათა ის ორი მატჩიც მოვიგოთ” , – ასე ისაუბრა მატჩის გმირმა, სანდრო მამუკელაშვილმა.

“ამაღამ ბედნიერებს დაგვეძინება. მაგრად ვითამაშეთ! არ აქვს მნიშვნელობა, ჩააგდებ თუ არა, მთავარია, რომ მაგრად იბრძოლო და ყველა იამაყებს შენით. ჩვენ მაგრად ვითამაშეთ, ბოლოს ძალიან კარგი მომენტები გვქონდა. ეს ძალიან კარგი მოგებაა კარგი გუნდის წინააღმდეგ. პირველ რიგში, ძალიან დიდი მადლობა გულშემატკივრებს. გამარჯვებისკენ გვიბიძგეს. მეექვსე კაცის როლი შეასრულეს. როგორც უკვე ვთქვი, მნიშვნელობა არ აქვს, რამდენს ჩააგდებ, მთავარია მაგრად იბრძოლო. ძალიან, ძალიან დაღლილი ვარ”, – ეს კი თად მაკფადენის სიტყვები გახლავთ.