ფორმულა 1-ის 2022 წლის სეზონის დასრულების შემდეგ სამეფო რბოლებს მსოფლიოს 4-გზის ჩემპიონი, სებასტიან ფეტელი დატოვებს. გერმანელი პილოტის ადგილს კი “ასტონ მარტინში” 41 წლის ესპანელი, ფერნანდო ალონსო დაიკავებს.
ამის შესახებ განცხადება თავად “ასტონ მარტინმა” და ფერნანდო ალონსომ გააკეთეს.
“ასტონ მარტინი”: “Aston Martin Aramco Cognizant Formula One მოხარულია გაცნობოთ, რომ ფერნანდო ალონსო გუნდს 2023 წლიდან, მრავალწლიანი კონტრაქტით შეუერთდება. კომპანია ძალიან გახარებულია, რომ გუნდი ფერნანდოს არაჩვეულებრივი გამოცდილებას, მის ბრწყინვალე ტემპსა და სარბოლო ოსტატობას შეიძენს. ისეთი ტალანტის დამატება, როგორიც ფერნანდოა, არის ორგანიზაციის მკაფიო განაცხადი ფორმულა 1-ში წარმატებული გუნდის შექმნაზე.”
ფერნანდო ალონსო: “წარმატებისკენ მიმავალ გზაზე წარმოჩენილი მონდომებისა და ჟინის გათვალისწინებით, Aston Martin ერთ-ერთი ყველაზე პერსპექტიული გუნდია ფორმულა 1-ში. დღეს არავინ აჩვენებს უფრო ღრმა ხედვასა და აბსოლუტურ სწრაფვას გამარჯვებისკენ და ეს მე ძალიან მიზიდავს. კვლავაც მინდა გამარჯვება, საუკეთესოებთან ბრძოლა. მსურს, ვიყო გუნდის ნაწილი, რომელიც ისწრაფვის სწავლისკენ, განვითარებისა და წარმატებებისკენ. გვესმის, რომ შედეგის მისაღწევად გასაკეთებელი ბევრია და მაქსიმალური ძალისხმევაა საჭირო.”
ფერნანდო ალონსო ფორმულა 1-ში თავის მე-19 სეზონს ატარებს და გაჩერებას არ აპირებს. ესპანელი პილოტი 2-გზის ჩემპიონია 2005 და 2006 წლებში “რენოსთან” ერთად.
კომენტარები post