“ბელგიასთან მატჩი უკვე დავივიწყეთ, ყველას დამარცხება შეგვიძლია” – რას ამბობენ ნაკრების წევრები ესპანეთთან მატჩამდე

დღეს ევრობასკეტის მეორე ტური იწყება. საქართვრლოს ნაკრები “თბილისი არენაზე” ესპნაეთის წინააღმდეგ ითამაშებს.

პირველ ტურში ჩვენმა ნაკრებმა მწარე მარცხი იწვნია ბელგიელთა წინააღმდეგ. მატჩი ოვერტაიმში 76:79 დავთმეთ.

დღევანდელი მატჩის წინ საქართველოს ნაკრების წევრებმა პრესასთან კომენტარებიც გააკეთეს:

“ვნახოთ, დღეს როგორ იქნება ფეხი. მაქსიმალურად გამოვიყენებ ამ დროს და მცირედი შანსი მაინც თუ იქნება, აუცილებლად ვითამაშებ. ბიჭებმა ყველაფერი გააკეთეს, ვიმსახურებდით ბელგიასთან მოგებას, თუმცა რას ვიზამთ. არაფერი ამით არ მთავრდება, წინ ოთხი თამაშია, ყველა მატჩის მოსაგებად გავდივართ მოედანზე და დარწმუნებული ვარ, ჯგუფიდან გავალთ. მგონია, რომ ყველა გუნდი ძალიან სახიფათოა, ყველას შეუძლია ყველასთან მოგება და მათ შორის, ჩვენც ქართველ გულშემატკივართან ერთად. მწვრთნელმა თქვა, რომ დაცვაში მითითებები არ შევასრულეთ? მწვრთნელი ყოველთვის მართალია, რაც გვითხრა, არ შევასრულეთ, ის თუ ასე ფიქრობს, გამოდის, რომ ასეც არის. ვიმუშავებთ, დღეს უკვე გავიარეთ რაღაცები, ხვალაც გავივლით და შეხვედრისთვის მზად ვიქნებით”, – განაცხადა გოგა ბითაძემ.

“უკვე დავივიწყეთ ბელგიასთან თამაში, რადგან ისეთი ტურნირია, წაგებულ ან მოგებულ მატჩზე რომ ვიფიქროთ, ძალიან უკან დაგვხევს. გუშინდელი თამაში განვიხილეთ, შეცდომები შევისწავლეთ და უფრო მობილიზებულები ვართ. ძლიერი მეტოქე გვყავს, მაგრამ ვფიქრობ, რომ ყველას დამარცხება შეგვიძლია. სხვა მატჩებიდან დამტკიცდა, რომ სუსტი გუნდი არ არსებობს და ყველა გუნდი სახიფათოა. ჩვენც ძალიან სახიფათო გუნდი ვართ და ვფიქრობთ, რომ ძალიან კარგად უნდა ვითამაშოთ, რადგან გუშინდელი მატჩიდან გამომდინარე ჩვენი რეაქცია სხვანაირი იქნება. დარბაზში სასწაული ატმოსფერო იყო, დიდი მადლობა გულშემატკივრებს. ათმაგად გულდასაწყვეტი იყო, რომ ასეთი თამაში ვერ მოვიგეთ. ასე რომ ვთქვათ, ბელგიასთან გვიან გავიღვიძეთ და მომდევნო მატჩში თავიდანვე ისე უნდა დავიწყოთ, როგორც ბელგიასთან ბოლოს ნაწილში ვითამაშეთ” – ასე ისაუბრა დუდა სანაძემ.

“ამ წაგების შემდეგ ძალიან რთული სიტუაცია იყო, მაგრამ გადავიტანთ. 4 თამაში გვაქვს დარჩენილი, ყველასთან შეიძლება თამაში, უბრალოდ, მართლა ძალიან გულდასაწყვეტია, რომ ბელგიასთან წავაგეთ. ეს თამაში უნდა მოგვეგო და ნელ-ნელა წინ წავსულიყავით. თუმცა, კალათბურთია, ვერაფერს შევცვლით, ახლა წინ ესპანეთი, შემდეგ თურქეთია და ამ თამაშებზე 100%-ით მომზადებული უნდა გამოვიდეთ. ძალიან დიდი მადლობა მინდა გადავუხადო ჩვენს გულშემატკივარს და დარწმუნებული ვარ, შემდეგ მატჩებშიც გაგვამხნევებენ, რადგან ეს ძალიან გვჭირდება. შანსი ჯერ კიდევ გვაქვს და ყველას გვინდა, რომ ჯგუფიდან გავიდეთ”, – ეს კი გიორგი შერამადინის განცხადება გახლავთ.