იუვენტუსთან თამაში ხვიჩა კვარაცხელიასთვის მაცდური შანსია – წერს Calciomercato წერილში, რომელიც მთლიანად ქართველ ფეხბურთელს დაეთმო.
კვარაცხელიამ მიმდინარე წელს ორი უგოლო თამაში ჩაატარა, რის შედეგადაც ბევრი საუბრობს, რომ ის არასათანადო ფორმაშია. ჟურნალისტი ჯოვანი ანუნციატა სტატიაში აღნიშნავს, რომ კვარას ფორმაში დაბრუნება მხოლოდ დროის საკითხია, მაგრამ იუვენტუსთან განსაკუთრებული თამაშია, რომელსაც განსაკუთრებული მოთამაშე სჭირდება, როგორიც ხვიჩაა.
Calciomercato: “პირველი წრის დასრულებამდე 2 ტურით ადრე ნაპოლი ზამთრის ჩემპიონია. ლუჩანო სპალეტის გუნდი 7 ქულით უსწრებს მდევრებს, იუვენტუსს და მილანს, რაც მნიშვნელოვანი უპირატესობაა, რომელიც სეზონის გიჟური დასაწყისისა და ხვიჩა კვარაცხელიას წყალობით მოიპოვა. თუმცა, ქართველი სეზონის განახლებას საუკეთესოდ ვერ შეხვდა – ამ ორთვიანმა პაუზამ მას კარგი არაფერი მოუტანა.
კვარა თავისი დრიბლინგებით, გოლებით, საგოლე პასებით, მოპოვებული პენალტებით გუნდის აშკარა ლიდერი იყო და ტიფოზებმა ლორენცო ინსინიე მალევე დაივიწყეს. მან ბოლოს 29 ოქტომბერს გამოიჩინა თავი სასუოლოსთან მატჩში, როდესაც გოლი და 2 საგოლე პასი მიითვალა, მერე კი ზურგის ტრავმა მიიღო. დაზიანების პრობლემა აშკარად მოგვარებულია, მაგრამ კვარა არ არის საუკეთესო კონდიციაში. განგაშის ზარი ჯერ კიდევ დეკემბრის მოსამზადებელ ეტაპზე გაისმა, რაც ინტერსა და სამპდორიასთან მატჩებში დადასტურდა. ქართველი გარემარბი ისე ვეღარ ბრწყინავს, როგორც რამდენიმე თვის წინ, საუკეთესო ფორმაშიც არაა, მაგრამ ეს ცალსახად დროის საკითხია, რადგან ნაპოლიში გატარებულ საწყის სამ თვეში აჩვენა, რომ ნიჭი აქვს.
ახლა სცენაზე დაბრუნების დროა და შანსი მაცდურია – ოთხ დღეში “სტადიო მარადონაზე” იუვენტუსი ჩავა. განსაკუთრებულ თამაშს განსაკუთრებული მოთამაშე სჭირდება და კვარა მზად უნდა იყოს ნეაპოლელი ტიფოზების დასამუხტად თამაშში, რომელიც 3 ქულაზე მეტს ნიშნავს”.
შეგახსენებთ, რომ ნაპოლი 44 ქულით ლიდერია, იუვენტუსს კი 37 ქულა აქვს და მე-2 ადგილზეა. ეს გუნდები ერთმანეთს 13 ნოემბერს, ნეაპოლში დაუპირისპირდებიან. ხვიჩა კვარაცხელიას მიმდინარე სეზონში 19 მატჩი აქვს ჩატარებული და თავი 8 გოლით, 8 საგოლე პასით და 3 მოპოვებული პენალტით გამოიჩინა.
კომენტარები post