საქართველოს ეროვნული ნაკრები ევროპის ჩემპიონატის შესარჩევ ეტაპზე ჩაერთო და ჯგუფში პირველი შეხვედრა ჩაატარა.
ვილი სანიოლის გაწვრთნიმა გუნდმა ბათუმი არენაზე ნორვეგიას უმასპინძლდა და დაძაბული მატჩის შემდეგ შედეგიან ფრეს დასჯერდა – 1-1.
ანგარიში სტუმრებმა პირველივე ტაიმში გახსნეს. ალექსანდერ სორლოტმა საჯარიმოს გარედან შესანიშნავი დარტყმა შეასრულა და გიორგი მამარდაშვილი უშანსოდ დატოვა.
მეორე ტაიმი “ჯვაროსნებმა” ბევრად აქტიურად დაიწყეს, რასაც მე-60 წუთზე გიორგი მიქაუტაძის გარღვევა და გოლი მოჰყვა. მას შემდეგ, ანგარიში აღარ შეცვლილა.
“პირველი 25-30 წუთით კმაყოფილი არ ვარ, ფეხბურთი ფაქტობრივად არ გვითამაშია, ეს თითქმის კატასტროფა იყო. შემდეგ სისტემა შევცვალე, დამატებითი თავდამსხმელიც დავამატე და გუნდმა მეტი ამბიცია აჩვენა.
პირველი გოლისას მამარდაშვილმა ვერ ითამაშა კარგად და ბურთი ცუდად მოიგერია, თუმცა ამის შემდეგ შესანიშნავად გამოიყურებოდა და ბევრი დარტყმა მოიგერია. ის უმაღლესი დონის მეკარეა, მეტი ლაპარაკი საჭირო არ არის.
3-მცველიანი სისტემით კმაყოფილი ვარ, აღნიშნული ტაქტიკა გასულ წელს კარგად გამოვიყენეთ, მაგრამ ფეხბურთი მუდმივი ევოლუციაა და თუ სულ ერთნაირად ითამაშებ, მაშინ ეს აღარ იმუშავებს.
მიქაუტაძემ ბოლო 6-8 თვეში ძალიან მოუმატა, ის მაღალ დონეზე თამაშობს და ეროვნული ნაკრებისთვის მნიშვნელოვანი გახდა. მისი ბუდუსთან შეწყვილება შეიძლება, თუ ზივზივაძე ფორმაში იქნება, რადგან მას ისევ სჭირდება დრო. ვფიქრობ, ზივზივაძე-მიქაუტაძის დუეტი ეფექტური იქნება.
ფეხბურთი არ არის თამაში ფუტბოლ მენეჯერი, სადაც აირჩევ პოზიციას, სად უნდა ითამაშოს ფეხბურთელმა და ამას ავტომატურად გააკეთებს. მოთამაშეებს სჭირდებათ რწმენა, რათა შეასრულონ თავიანთი საქმე.
კვარაცხელია ბრწყინვალე ფეხბურთელია, მას ბევრ პოზიციაზე შეუძლია თამაში და როცა ბუდუ მინდორზეა, მაშინაც ხშირად მოქმედებს ცენტრალურ ზონაში. ასე იყო გასული ერთა ლიგის შესარჩევ მატჩებშიც. ხვიჩა არასდროს წუწუნებს მიცემულ დავალებებზე, ის პატიოსანია და ნებისმიერ პოზიციაზე სრული თავდადებით მოქმედებს. მისთვის უფრო ბუნებრივია მარცხნივ თამაში, ასეა ნაპოლიშც, ამიტომ ამას მომავალში გავითვალისწინებ.
ჩაკვეტაძე ნიჭიერი ფეხბურთელია, თუმცა მას ტრავმების გამო ძალიან, ძალიან ბევრი დრო გაუცდა. თანამედროვე ფეხბურთში საჭიროა ბევრი სირბილი, დაცვაში თამაში და მოძრაობა. კვარაცხელია ამას მუდამ აკეთებს, თუმცა ჩაკვეტაძე ზოგჯერ არა, რადგან მას დრო სჭირდება ფიზიკური კონდიციების აღდგენისთვის.შეტევაში ყველას ერთად ვერ დავაყენებ, მე ბალანსი მჭირდება და ამაზე ვარ პასუხისმგებელი”, – განაცხადა მატჩის შემდეგ სანიოლიმ.
კომენტარები post