ისტორიაში ერთ-ერთი საუკეთესო ჩოგბურთელი, სერენა უილიამს დიდი ალბათობით კარიერას მალე დაასრულებს. Vogue-სთვის დაწერილ ბლოგში 40 წლის ჩოგბურთელმა დაადასტურა, რომ სურს მეორე შვილი იყოლიოს.
“ჩემმა 5 წლის შვილმა მითხრა, რომ უნდა უფროსი და გახდეს. არასდროს მსურდა არჩევანის გაკეთება ოჯახსა და ჩოგბურთს შორის, რადგან ეს უსამართლოა. კაცი რომ ვყოფილიყავი, თამაშს უპრობლემოდ გავაგრძელებდი, ჩემი ცოლი კი ოჯახის გაფართოებით იქნებოდა დაკავებული. შესაძლოა ტომ ბრეიდივით ვყოფილიყავი, მსგავსი შესაძლებლობა რომ მქონოდა.
მომწონდა ორსულად ყოფნა და სანამ შემეძლო, ბოლო დღემდე ვმუშაობდი. ბევრმა არ იცის, 2017 წელს ავსტრალიის ღია პირველობა რომ მოვიგე, მაშინ 2 თვის ფეხმძიმედ ვიყავი. ამ თვეში 41 წლის ვხდები, რაღაც უნდა შევცვალო. აღარ მინდა აქტიური ჩოგბურთელის კარიერის პირობებში დავორსულდე. სიტყვა ‘პენსია’ არ მომწონს, ამ პროცესს ევოლუციას დავარქმევ. ჩოგბურთიდან ჩემთვის მნიშვნელოვან სხვა სფეროში გადავდივარ. რამდენიმე წლის წინ საკუთარი ბიზნესი წამოვიწყე, მისი გაფართოება მინდა.
სამწუხაროდ უიმბლდონის მოგება წელს ვერ შევძელი, არ ვიცი ამერიკის ღია პირველობის მოსაგებად მზად თუ ვიქნები. ვიცი, რომ გულშემატკივრები ფიქრობენ, რომ მარგარეტ კორტთან გათანაბრება, ჯერ ლონდონში, შემდეგ ნიუ იორკში შემეძლო, შემდეგ კი გამოსამშვიდობებელი სიტყვები მეთქვა. ეს კარგად არ გამომდის და მათ სათქმელად განსაკუთრებულ მომენტს არ ველოდები. მომენატრება ის სერენა, რომელიც ჩოგბურთს თამაშობდა. მომენატრებით თქვენ,”– დაწერა სერენამ.
კომენტარები post