22 წლის გიორგი მამარდაშვილმა ამ სეზონში ვალენსიას ყველა ოფიციალური მატჩი სასტარტოში დაიწყო. მასე მერე, რაც გიორგიმ კონკურენცია ნიდერლანდელ იასპერ სილესენს მოუგო და ერთ დროს ვალენსიას ყველაზე ძვირადღირებულ ფეხბურთელს გუნდიდან წასვლა მოუწია, ქართველ გოლკიპერს იაგო ერერინისა და კრისტიან რივეროს (ხაუმე დომენეკს ტრავმა აწუხებს) კონკურენციის დაძლევა საერთოდ არ უჭირს.
გიორგიმ ლა ლიგის 15-ვე მატჩში შეუცვლელად ითამაშა, მაგრამ, როცა კოპა დელ რეის მე-3 წრის მატჩში ქვედალიგელ ლა ნუსიასთან (ვალენსიამ 3:0 მოიგო) კარში ისევ მამარდაშვილი ვიხილეთ, ამან კონკურენტების გაბრაზება გამოიწვია, ცეცხლზე ნავთი კი გატუზოს სიტყვებმა დაასხა…
“ეჭვები მღრღნის, რა გავაკეთო, მივცე იაგოს სათამაშო დრო, თუ მამარდაშვილის ნდობა გავაგრძელო”, თქვა გატუზომ ლა ნუსიასთან მატჩამდე. კარში ქართველი მეკარე ვიხილეთ, რომელიც მხოლოდ 78-ე წუთზე შეცვალა იაგო ერერინმა. მატჩის შემდეგ გატუზო აგრძელებდა: “მამარდაშვილი იმიტომ დავაყენე, რომ ეს მატჩი მნიშვნელოვანი იყო და შიშით ვუყურებდი”. გამოდის, რომ იტალიელი სპეციალისტი მეორე და მესამე მეკარეებს საერთოდ არ ენდობა. რივეროს კი მან “მესამე მეკარე” უწოდა. ასე რომ, ერთ დღეში რინომ ორივე სათადარიგო გოლკიპერი გადაიკიდა.
“დიდი ხანი ვფიქრობდი ამ გადაწყვეტილებაზე, ამან იაგო, როგორც ჩანს გააბრაზა, მე მესმის მისი, თუმცა ის მწვრთნელის გადაწყვეტილებას ემორჩილება. ესმის, რომ მწვრთნელი მე ვარ და გადაწყვეტილებებს მე ვიღებ. ბოდიში იაგოს, ის ყოველთვის კარგად ვარჯიშობს, ბოდიში კრისტიანს, ის მესამე მეკარეა და სკამზეც ვერ ხვდება, მაგრამ აქ გადაწყვეტილებებს მე ვიღებ”, – განაცხადა ჯენარო გატუზომ.
კომენტარები post