საქართველოს ჩემპიონი “დინამო ბათუმი” ჩემპიონთა ლიგის საკვალიფიკაციო ეტაპიდან გამოვარდა. ბათუმელები ძალიან დაძაბულ შეხვედრაში “სლოვან ბრატისლავას” წინააღმდეგ ოვერტაიმში დამარცხდნენ.
პირველი ოვერტაიმის შემდეგ ბათუმი 1:0-ს იგებდა ზურიკო დავითაშვილის გოლით, მაგრამ მეორე ოვერტაიმში 2 გოლი მივიღეთ, ჯერ სლოვაკთა სომეხმა ფეხბურთელმა გაგვიტანა, მეორე გოლი კი კუთხურიდან, ჩახვეული დარტყმით მივიღეთ.
მატჩის შემდეგ გამართულ პრესკონფერენციაზე მედიის შეკითხვებს ბათუმელთა მთავარმა მწვრთნელმა, გია გეგუჩაძემ უპასუხა.
“რა თქმა უნდა გულდაწყვეტილები ვართ, უბრალოდ რესურსი არ გვეყო, ამის მიზეზი კი მოედანზე თქვენ თვითონ იხილეთ. ჩვენი ძლიერი მხარე დავკარგეთ, რაც ბურთის ფლობაა. ამან თამაშს დაღი დაასვა.
დამატებით დროში თამაში ძირითადად ჩვენს ნახევარზე მიმდინარეობდა და ჩვენ კონტრ-შეტევებზე ვთამაშობდით.
ფლამარიონი ერთ-ერთი სასარგებლო ფეხბურთელია და დიდ სამუშაოს ასრულებს, მეტოქის მცველებს იზიდავს და სხვა ფეხბურთელებს ეხსნებათ ზონები. ვთვლი, რომ ჩვენ ძალიან კარგი გუნდი გვყავს და ყოველთვის შევეცდებით ჩვენსას.
ფეხბურთელები ამ მარცხს განიცდიან, მათთან არაფერი განსაკუთრებული არ მილაპარაკია, მათ დასვენების დღე მივეცი რათა ყველაფერი გაანალიზონს, ცხოვრება გრძელდება.
აზაროვის და კიდევ რამდენიმე ფეხბურთელის შეცვლის მიზეზი მათი ფიზიკური მდგომარეობა არ ყოფილა, გარკვეული ჯანმრთელობის პრობლემის გამო მოხდა ეს შეცვლები.
ჯერ-ჯერობით გუნდის გაძლიერება არ იგეგმება, მაგრამ ფეხბურთელების დამატებას არ გამოვრიცხავ, მაგრამ ესეც ალბათ უფრო სამომავლოდ და არა ეხლა.
გაფრინდაშვილის თამაში ტრავმის გამო ისედაც გამორიცხული იყო და მის წასვლას არავითარი გავლენა არ ჰქონია, მაგრამ მამუკა კობახიძის, კაპიტნის არ ყოფნა საკმაოდ დიდი დანაკლისი იყო.
მინდა მეტოქე გუნდს წარმატებები ვუსურვო, რადგანაც სლოვანში ქართველი ფეხბურთელებიც თამაშობენ და მათ წარმატებას ვუსურვებ.“- განაცხადა გეგუჩაძემ.
“დინამო ბათუმი” ევროტურნირისთვის საგზურისთვის “ლეხ პოზნანს” დაუპირისპირდება
კომენტარები post