ვალიადოლიდთან შეხვედრაში 22 წლის ქართველ მეკარეს 5 სეივი ჰქონდა და რომ არა ბოლო წუთზე “ღამურების” მცველების მორიგი ძალიან ცუდი თამაში, სტუმრები ქულას მაინც მოიპოვებდნენ, მატჩის საუკეთესო მოთამაშედ კი გიორგის დაასახელებდნენ. მაგრამ ასე არ მოხდა. გატუზოს გუნდმა წააგო და თუ მდგომარეობას სასწრაფოდ არ გამოასწორებს, გავარდნის საფრთხე რეალურად დაეუმექრება.
Super Deporte ვალიადოლიდი-ვალენსიას შეხვედრას ეხმაურება და ყურადღებას გიორგი მამარდაშვილზე ამახვილებს.
“გოლიათი, რომელიც საკუთარმა მცველებმა დაასუსტეს. მეკარემ ბრწყინვალედ ითამაშა ვალიადოლიდთან, მაგრამ კარი მშრალად ვერ შეინახა.
“ხოსე სორილიაზე” ვალენსიის მეკარე სუპერგმირად მოგვევლინა, განსაკუთრებით მეორე ტაიმში, როდესაც წინ აღუდგა ვალიადოლიდის ყველა მცდელობას, ერთის გამოკლებით. მაგრამ ყველაფერი დაცვის ხაზის არაეფექტურმა თამაშმა გადაწყვიტა და საფინალო ანგარიში 0:1 დაფიქსირდა.
არადა, ქართველ მეკარეს პირველ ტაიმში საქმე არ ჰქონია, არავინ აწუხებდა და მისი ერთადერთი საზრუნავი, პასის გაკეთებისას საუკეთესო გადაწყვეტილების მიღება იყო. მეორე ტაიმში კი მამარდაშვილს თავისი შესაძლებლობების დემონსტრირება დასჭირდა. ჯერ იყო ოსკარ პლანოს საჯარიმოს გარედან დარტყმა კუთხეში. შემდეგ ჯერ დარვინ მაჩისს აუღო, მოგვიანებით კი ერთი-ერთზე გონსალო პლატას არ გაატანინა. მამარდაშვილმა 20-წუთიან მონაკვეთში ოთხჯერ იხსნა თავისი გუნდი, მაგრამ მატჩის მიწურულს, კაილ ლარინის დარტყმის მომენტში მას არაფრის გაკეთება შეეძლო. მამარდაშვილი გოლიათად მოგვევლინა, მაგრამ ვალენსიას დაცვის ხაზში ხვრელებმა მატჩის ბედი გადაწყვიტა”.
კომენტარები post