მამუკა გორგოძე ქართული რაგბის ერთ-ერთი ყველაზე დიდი ლეგენდაა, “გორგოძილას” საქართველოს ნაკრებში 75 თამაში აქვს ჩატარებული და პროფესიონალური კარიერა 2 წლის წინ დაასრულა.
გორგოძესთან ინტერვიუ ფრანგულმა სპორტულმა გამოცემამ, Midi Olympic-მა ჩაწერა.
“რაგბის თამაში დიდად არ მენატრება, თუმცა ყოველდღიურად ვვარჯიშობ, შინ ყველანაირი საშუალება მაქვს ამისთვის, დავრბივარ კიდეც. რაც სპორტული კარიერა დავასრულე, ერთი კილოგრამიც კი არ მომიმატია.
იტალიასთან სუპერ მნიშვნელოვანი თამაში იყო, ჩვენ დავამარცხეთ დიდი გუნდი, რომელმაც 6 ერზე სტუმრად უელსს მოუგო. თამაში ბათუმში გაიმართა, 20 ათასმა გულშემატკივარმა კი გიჟური ატმოსფერო შექმნა სტადიონზე. ხალხს იქ ძალიან უყვარს “ბორჯღალოსნები”, საქართველოში რაგბის პოპულარულობა იზრდება.
ჩვენს რაგბიში რაღაცები იცვლება, ეს გასულ ნოემბერს საფრანგეთშიც გამოჩნდა. სამწუხაროდ, ბორდოში მსაჯმა დაგვჩაგრა, ამის გამო შედეგი 15:41 მთლად სამართლიანი არ იყო. ამ პროცესში ჩვენ ფიჯის ფრე ვეთამაშეთ – 15:15. ფიჯის დიდებული გუნდი ჰყავდა, რომელსაც მხოლოდ რადრადრა აკლდა.
ბევრს ვშრომობთ და ბოლო დროს უფრო რეგულარულად ვეთამაშებით “დიდ” გუნდებს. დიდი წვლილი მიუძღვის ბიძინა ივანიშვილსაც, რომელმაც ათეულ მილიონობით მოახმარა ქართულ რაგბის. ამ თანხით აშენდა სარაგბო ცენტრები და სტადიონები, რისთვისაც მისი მადლობელი ვარ.
TOP 14-ში თითქმის ყველა მორაგბე ძალიან ძლიერი იყო, მაგრამ რაგბის დროს უკან არავისთან დამიხევია. მათი შეძულებაც კი მჭირდებოდა, რომ უფრო ძლიერად მეთამაშა. შიშით კი არავისი მეშინოდა, უფრო მათ უნდა ჰკითხოთ ჩემზე”,- განაცხადა გორგოძემ.
კომენტარები post