ტრავმით გამოწვეული იძულებითი შესვენების შემდეგ ხვიჩა კვარაცხელია სერია A-ს 2023-ის პირველ ტურებში დაუბრუნდა. ინტერთან 0:1 მარცხისა და სამდორიასთან 2:0 გამარჯვების შემდეგ ქართველი ლეგიონერი იტალიურ მედიაში კრიტიკის ობიექტი გახდა. 21 წლის გარემარბს 29 ოქტომბრის შემდეგ ოფიციალურ მატჩებში არც გოლი გაუტანია და არც საგოლე პასი გაუკეთებია…
ორივე ამ შეხვედრაში სპალეტიმ კვარაცხელია მეორე ტაიმში შეცვალა, სამპდროსიასთან მას გოლის გატანის შესანიშნავი შანსიც ჰქონდა. მაშინ, როცა კვარაცხელიას აკრიტიკებს მედია, მას ნაპოლის თავკაცი ლუჩანო სპალეტი თავგამოდებით იცავს. სპალეტი აცხადებს, რომ ქართველ ფეხბურთელს კარგი თამაშები ჰქონდა.
სხვათა შორის, ცნობილი ანალიტიკური და სტატისტიკური საიტები გარკვეულწილად, იზიარებენ ნაპოლის მწვრთნელის მოსაზრებას. მიუხედავად იმისა, რომ შედეგიანი ქმედება ხვიჩას ამ ორ მატჩში არ ჰქონია, მან მაინც საშუალო შეფასებები დაიმსახურა WhoScored-ისგან – 6.23 ინტერთან, ხოლო 6.54 სამპდორიასთან.
რაც ყველაზე მთავარია, კვარაცხელია კვლავ სერია A-ს საუკეთესო ფეხბურთელია. WhoScored-ის სეზონის საუკეთესოებში ხვიჩა პირველ ადგილზეა საშუალოდ 7.39 ქულით. ის მე-2 ადგილზე მყოფ ვიკტორ ოსიმენს 8 მეასედით უსწრებს, რომელიც 10 გოლით სერია A-ს მიმდინარე სეზონის ბომბარდირია. სხვათა შორის, სამეულში ყველა ნეაპოლურ კლუბს წარადგენს – პორტუგალიელი მარიო რუი 7.28 ქულით მესამეა.
გამოცემამ კვარაცხელიას ყველაზე მაღალი შეფასება ბოლონიასთან (3:2) მატჩში დაუწერა – 8.88. იმ მატჩში ხვიჩას ანგარიშზე საგოლე პასი იყო. ყველაზე დაბალი შეფასება კი მან ლეჩესთან (1:1) შეხვედრაში მიიღო – 6.15.
სერია A 2022/23. TOP 10. WhoScored
1. ხვიჩა კვარაცხელია (ნაპოლი) – 7.39
2. ვიკტორ ოსიმენი (ნაპოლი) – 7.31
3. მარიო რუი (ნაპოლი) – 7.28
4. სერგეი მილინკოვიჩ-სავიჩი (ლაციო) – 7.27
5. ლორენცო პელეგრინი (რომა) – 7.21
6. ადრიენ რაბიო (იუვენტუსი) – 7.20
7. პაულო დიბალა (რომა) – 7.19
8. რაფაელ ლეაო (მილანი) – 7.18
9. მატია ძაკანი (ლაციო) – 7.17
10. ლაუტარო მარტინესი (ინტერი) -7.17.
კომენტარები post