ხვიჩა კვარაცხელიამ “ნაპოლის” რიგებში მეორე შეხვედრა ჩაატარა და ქართველმა ფეხბურთელმა კვლავ შეძლო გოლის გატანა. ხვიჩამ “პერუჯას” კარი ოსიმენთან გათამაშებული შესანიშნავი კომბინაციის შემდეგ მატჩის მე-5 წუთზე აიღო.
ორი მატჩის შემდეგ კვარას ანგარიშზე უკვე 3 გოლი და 1 საგოლე გადაცემაა. მატჩის შემდეგ იტალიურმა მედიამ კვარაცხელიას თამაში შეაფასა.
“ნაპოლიმ სერია B-ს წევრ პერუჯას 4:1 სძლია და ამ თამაშშიც ბრწყინავდა გუნდის ახალწვეული ხვიჩა კვარაცხელია, რომელმაც პირველი გოლი ოსიმჰენთან ბურთის გათამაშების შემდეგ გაიტანა. შეიძლება ითქვას, რომ კვარაცხელია უკვე არის ნეაპოლელთა ოქრო.”– Calcioinpillole
“ქართველმა ფეხბურთელმა პერუჯას ფანტასტიკური გოლი გაუტანა. ის მოედანზე თავს ძალიან კომფორტულად გრძნობს და თავისი შესაძლებლობების სრულად წარმოჩენისთვის შანსს ხელიდან არ უშვებს. KK, როგორც ქომაგებმა ხვიჩას შეარქვეს, თანაგუნდელებთან უკვე საკმაოდ კარგად არის შეთამაშებული და ამჯერადაც, ყველაფერი მაგრად გააკეთა: მეკარესთან პირისპირ დარჩენილმა ძალიან ოსტატურად დაარტყა. აუცილებლად უნდა აღინიშნოს ის სისწრაფე, რომლითაც კვარაცხელიამ ეს ყველაფერი შეძლო.”– Sportface
“პერუჯასთან მატჩში ანგარიში ნაპოლის ახალმა მარგალიტმა კვარაცხელიამ გახსნა. ერთი შეხედვითაც სჩანს, რომ ის ჯერ იდეალურ ფიზიკურ კონდიციებში არაა, თუმცა, ტალანტის წარმოჩენას მაინც ახერხებს.”– Eurosport-ის იტალიური ვერსია.
კომენტარები post