ხვიჩას იტალიური ზღაპარი ჯერ მხოლოდ ახლა დაიწყო და მას წინ უდიდესი მომავალი ელის. ქართველმა შემტევმა “მონცას” წინააღმდეგ შესანიშნავი შეხვედრა ჩაატარა და 2 გოლი გაიტანა.
კვარას ასეთმა პერფორმანსმა დიდი გამოხმაურება ჰპოვა იტალიურ სპორტულ მედიაში და მის მიმართ მხოლოდ დადებით გამოხმაურებებს თუ შეხვდებით:
Gazzetta Dello Sport: “კვარაცხელიას შოუ! ქართველი შთამბეჭდავი იყო სეზონის სადებიუტო საშინაო თამაშშიც. შოუ ყველა გაგებით. ენთუზიაზმით სავსე “მარადონა”, გუნდი, რომელიც ლამაზ ფეხბურთს აჩვენებს და ფეხბურთელები, რომლებიც წარმოუდგენლად თამაშობენ. მონცამ ვერაფერი მოახერხა კვარაცხელია-ოსიმენის დუეტთან. გოლების თანმიმდევრობა იგივე იყო, როგორც ვერონაში და კიდევ უფრო ეფექტური. მეორე ტაიმში ისევ K ფაქტორი ამუშავდა. ქართველმა დუბლი შეასრულა და კიმ მინ-ჯემაც გაიტანა. სათადარიგო სკამზე დარჩნენ ნდომბელე, რასპადორი და სიმეონე – ფეხბურთელები, რომლებსაც უკვე ლამაზი და სანახაობრივი ნაპოლის გაუმჯობესება შეუძლიათ. ქართველის სტარტი კი წარმოუდგენელია – ორ თამაშში სამი გოლი: თავით, მარჯვენა ფეხით და მარცხენა ფეხით. ის მართლაც სრულყოფილი მოთამაშეა”.
Calciomercato: “ამ კვარაცხელიასთან ერთად ოცნება ლეგიტიმურია, ის “სტადიო მარადონას” ახალი კერპია”.
Corriere Dello Sport: “სერია A-ს პირველ ორ თამაშში 3 გოლი. დუბლი მონცას შესაჩერებლად. ჯერ შედევრი ინსინიეს სტილში, მარჯვენა ფეხით შორეულ კუთხეში, შემდეგ საოცარი დრიბლინგი: ვინც ამ საწყის ორ ტურში ნაპოლის თამაში ნახა, მიხვდა, რომ “აძურიში” ფენომენი მივიდა. ხვიჩა კვარაცხელია 21 წლისაა და ყველა თვისება აქვს იმისთვის, რომ ტოპმოთამაშე გახდეს. სწორედ ის იყო სპალეტის ორი წარმატების წინამძღოლი”.
Tuttosport: “კვარა-ოსი: საშიში დუეტი. ნაპოლი ოცნებობს “მარადონას” ახალი კერპისა და მატჩის გმირის კვარაცხელიას ჯადოქრობებით. დუბლი და ბრწყინვალე თამაში ქართველი ფეხბურთელისგან, რომელმაც თავისი ტიფოზების წინაშე სადებიუტო მატჩში აჩვენა ძლიერი ხასიათი და განსაკუთრებული ჰარმონია მოედანზე ოსიმენთან, რომელმაც ასევე გაიტანა”.
კომენტარები post