საქართველოს ნაკრების მეორე მეკარისთვის, გიორგი მამარდაშვილისთვის გასული სეზონი საოცარი გამოდგა. მან “ვალენსიაში” პირველი მეკარის სტატუსის მოპოვება შეძლო, რისთვისაც ბევრი იმუშავა.
21 წლის ქართველმა მეკარემ Marca-ს მისცა ინტერვიუ, სადაც ძალიან საინტერესო თემების შესახებ ისაუბრა.
“პრესეზონს მალე დავიწყებთ და ამის გამო, ბედნიერი ვარ. ახლა ორმაგად მოტივირებული ვარ, რომ ახალი სეზონი წინაზე ბევრად უკეთესი მქონდეს. გასულ სეზონში ნამდვილად დიდი გამოცდილება მივიღე და ყველაფერს გავაკეთებ, რომ მომდევნო სეზონებში ეს გამოცდილება გამოვიყენო. მართალია, ვალენსიაში მეორე გუნდში სათამაშოდ ჩავედი, მაგრამ შეიძლება ითქვას, საჭირო დროს საჭირო ადგილას მოვხვდი და ვფიქრობ, ეს შესაძლებლობა მაქსიმალურად გამოვიყენე. ჩემზე დიდი შთაბეჭდილება მოახდინა ყველაფერმა, რაც განვიცადე და რასაც დღემდე ვსწავლობ. ლა ლიგაში თამაში ძალიან ემოციური იყო. მომდევნო სეზონში ჩემი მიზანია, რაც შეიძლება მეტი ვითამაშო და გუნდთან ერთად ევროტურნირების საგზური მოვიპოვოთ.
საქართველოს დატოვება და ლა ლიგაში გადასვლა დიდი შრომის, ძალისხმევისა და გარკვეული იღბლის შედეგი გახლდათ. ახლა პირველი გუნდის წევრი ვარ და სრულებით მზად ვარ, ვალენსიაში სულ უფრო მეტი თამაში ვითამაშო.
ძალიან რთული იყო იმ 4 თვის განმავლობაში სათადარიგო სკამზე დარჩენა, მაგრამ ძალიან ბევრი ვიმუშავე, რომ ძირითად შემადგენლობაში დავბრუნებულიყავი. ეს იყო ერთადერთი გზა ამ სიტუაციის შესაცვლელად. ლა ლიგა ძალიან რთული ტურნირია, მაგრამ მას შემდეგ, რაც რეგულარულად თამაში დავიწყე, უფრო თავდაჯერებული გავხდი, უფრო მეტად ადაპტირება შევძელი და ყველაფერი უფრო გამიადვილდა.
გასულ სეზონში კარგად ვითამაშე და ბევრი ფიქრობს, რომ სხვადასხვა ასპექტები გავაუმჯობესე. მიუხედავად ამისა, ყოველდღე ბევრი სამუშაო მაქვს იმისთვის, რომ კიდევ განვითარდე. ვალენსია დიდი კლუბია, საოცარი ისტორიით და ტრადიციებით, ბედნიერი ვარ, რომ ამ კლუბში ვთამაშობ. რა თქმა უნდა, მინდა ვალენსიაში თამაში და ცხოვრება გავაგრძელო. შესანიშნავი კლუბი და ქალაქია, სადაც ძალიან კარგი ხალხი ცხოვრობს.”
“ვალენსია” პირველ ამხანაგურ მატჩს 18 ივლისს “ბორუსია დორტმუნდის” წინააღმდეგ გამართავს, ლა ლიგა კი 14 აგვისტოს აიღებს სტარტს.
კომენტარები post