“მათ დაბრუნებაში ხალხი დაეხმარათ, საოცარი ატმოსფერო იყო” – ბელგიელთან ნაკრების მწვრთნელი

დაიწყო ევრობასკეტი. სტარტი ქართველთათვის კარგი ნამდვილად ვერ გამოვიდა. ბელგიელებთან მძიმე ბრძოლაში, ოვერტაიმში ჩვენებურები დამარცხდნენ ანგარიშით 76:79.

მატჩის შემდეგ ბელგიელთა ნაკრების თავკაცმა, დარიო ჯერჯიამ, პრესასთან ასეთი კომენტარი გააკეთა:

“კარგად ვთამაშობდით და კონტროლიც გვქონდა მატჩზე. ბოლოს შეცდომები დავუშვით და შეიძლებოდა, ამას ცუდი შედეგიც გამოეწვია და დავსჯილიყავით. მეორე ტაიმის ბოლოს ბევრი ჯარიმა გავაფუჭეთ. ბედნიერი და ამაყი ვარ ამ ბიჭებით. ხალხი მართლა დაეხმარა მეტოქეს თამაშში დაბრუნებაში. იმედი მაქვს, რომ მომდევნო მატჩებზე უფრო მეტი ადამიანი მოვა. აქვე ვიტყვი, რომ ესპანეთის მატჩიც კარგი იყო. თურქეთისა და მონტენეგროს თამაშიც ბოლომდე დაძაბული იყო.”

ბოლო წამებში ნასროლი სამქულიანის ავტორმა, ჯონათან ტაბუმ აღნიშნა, რომ საოცარ ატმოსფეროში უწევდათ თამაში, რაც მათ ძალიან უყვართ:

“ყველამ ნახა, რომ რთული თამაში იყო. მასპინძელ ნაკრებს ვეთამაშებოდით, თამაშს ვაკონტროლებდით, მაგრამ ბოლოს ქულები ვეღარ ჩავაგდეთ. მათ თამაშში დაბრუნება მოახერხეს, მაგრამ ჩვენ მაინც მოვიგეთ.”

“ცუდად ვგრძნობდი თავს, რადგანაც მათ ქამბექის საშუალება მივეცით. რვა წამი იყო დარჩენილი და კარგი სროლა გამოვიდა, რაც გუნდისთვის გამარჯვების მომტანი იყო. როცა ბურთი მივიღე, ვიცოდი, რომ რაიმე განსაკუთრებული უნდა გამეკეთებინა. რვა წამი იყო დარჩენილი და მე ეს გავაკეთე. ჩვენ წინა ევრობასკეტზეც პირველი მატჩი მოვიგეთ, მაგრამ ეს არაფერს ნიშნავს. წინ კიდევ მნიშვნელოვანი მატჩებია და ბოლომდე უნდა ვიბრძოლოთ.”