აკროპოლისის თასზე საქართველოს ნაკრები საბერძნეთის წინააღმდეგაც დამარცდა 67:80. აღსანიშნავია, რომ ევრობასკეტისთვის მოსამზადებელ ეტაპზე ეს საქართველოს ზედიზედ მეექვსე მარცხი იყო.
საბერძნეთთან წაგებული მატჩის შემდეგ მედიასთან კომენტარი ილიას ზუროსმა და სანდრო მამუკელაშვილმა გააკეთეს.
ზუროსი: “საბერძნეთის ნაკრებს დამსახურებულ გამარჯვებას ვულოცავ. სამწუხაროდ, იგივე პრობლემები გვქონდა, რაც წინა მატჩში, განსაკუთრებით მესამე მეოთხედში. მეორე ტაიმი ძალიან ცუდად ვითამაშეთ, მაგრამ პირველ ტაიმში კარგი კალათბურთი ვაჩვენეთ და ეს უნდა შევინარჩუნოთ. თამაშს ვაკონტროლებდით, ყველაფერი კარგად იყო. ჩვენი მიზანია, მეტი სტაბილურობა. მე მჯერა ამ გუნდის. სულ მალე ვიქნებით უკეთეს მდგომარეობაში.
ჩვენთვის ეს მატჩები მოსამზადებელი ეტაპია, არ ვაქცევთ დიდად ყურადღებას შედეგს. მგონი, ხალხს არ ესმის, ეს მატჩები არის სავარჯიშო შეხვედრები, ჩვენ უნდა განვითარდეთ, უკეთესი კალათბურთი ვითამაშოთ. ამის გარეშე შეუძლებელია წინსვლა, რადგან ჩვენ ახალი სახეები გვყავს გუნდში. ჩვენთვის მნიშვნელოვანია დაცვის გაუმჯობესება. უნდა გამოვიყენოთ ბოლო ორი თამაში პროგრესისთვის. ეს ჩვენთვის ძალიან მნიშვნელოვანია. ერთი-ერთზე დაცვა უნდა გავაუმჯობესოთ და შეტევაში ბურთი უკეთ ვაკონტროლოთ – ესაა ჩვენი მიზანი ხვალინდელი მატჩის წინ”.
მამუკელაშვილი: “სამწუხაროდ, დღეს წავაგეთ, თუმცა ჩემი აზრით, ვიბრძოლეთ და 100 პროცენტით დავიხარჯეთ. რა თქმა უნდა, ბევრი შეცდომა დავუშვით, რაც გამოსწორებადია. მე მჯერა ჩემი გუნდელების. ყველას ერთმანეთის გვჯერა, ერთად ვართ, ერთ მუშტად შეკრულები ვართ. გარწმუნებთ, რომ მალე ყველაფერს დავალაგებთ და უკეთესობისკენ წავალთ, რაც უკვე დაიწყო ამ ტურნირით. სწორედ ასე ვფიქრობ.
რაც შეეხება ჩემს თამაშს, წაგებული თამაშის მერე კმაყოფილი ვერ ვიქნები, თუმცა გუნდს უკეთესად ვეწყობი. ვცდილობ, ვიპოვო ის ადგილები, სადაც შემიძლია თორნიკეს და გიორგის დავეხმარო, ვიბრძოლო ფარზე, რომ გუნდს მეორე შეტევის შანსი მივცე.
იანისმა ორი დღის წინ მითხრა, რომ დაისვენებდა, ევრობასკეტისთვის ასვენებენ. პირადად ძალიან მგულშემატკივრობს. იანისი ფიქრობს, რომ წლეულს მილუოკიში მასთან ერთად მეტი როლი მექნება და ეს ძალიან მახარებს”.
კომენტარები post