იტალიის ჩემპიონატის მე-20 ტურში ნაპოლიმ ვიქტორ ოსიმენისა და ჯოვანი სიმეონეს გოლებით რომა 2:1 დაამარცხა, ხვიჩა კვარაცხელიამ კი, რომელიც ორკვირიანი პაუზის შემდეგ დაბრუნდა, საგოლე პასი გააკეთა.
მატჩის შემდეგ ჟოზე მოურინიომ კომენტარი გააკეთა. პორტუგალიელი სპეციალისტის აზრით, რომა წაგებას არ იმსახურებდა, მაგრამ ზოგჯერ ფეხბურთში შედეგი უსამართლოა:
“კარგად ვითამაშეთ, მაღალი პრესინგი გვქონდა, თავსაც ძალიან კარგად ვიცავდით. წავაგეთ, მაგრამ უფრო თავდაჯერებულები გავხდით. ნაპოლის ყველაზე მეტი პრობლემა შევუქმენით, შევაშინეთ. სავსე სტადიონი ცარიელი ჩანდა, ისე გავაჩუმეთ. ბოლოს სამი შეცვლა გავაკეთე და მოედანზე სამი ბავშვის შეყვანა მომიწია, რომლებიც შარშან ტრიგორიაზე ხელოვნურ საფარზე თამაშობდნენ, ახლა კი აქ არიან და ასე თამაშობენ. ეს სიამოვნებას მანიჭებს. ზოგჯერ ფეხბურთი უსამართლოა და გუნდი, რომელიც მეტს იმსახურებს, მარცხდება. დღეს მოგება დავიმსახურეთ.
სპალეტის თავიდან მადლობა გადავუხადე საჩუქრისთვის, რომელიც მაჩუქა, მაგრამ ჯერ არ ვიცი, რა არის, არ მინახავს. კოლეგისგან საჩუქარი ყოველთვის სასიამოვნოა. თამაშის შემდეგ კი უბრალოდ ჩავეხუტე. გარდა იმისა, რომ ნაპოლი ძალიან კარგი გუნდია, ვარსკვლავიც მისთვის ანათებს. ვიცი, რადგან 8 ჩემპიონის ტიტული მაქვს მოგებული და წელს ვარსკვლავი ნაპოლისთვის ანათებს. ნაპოლი ‘სკუდეტოს’ აუცილებლად მოიგებს.
მანჩინიმ პრაქტიკულად მარჯვენა მცველად ითამაშა კვარაცხელიას წინააღმდეგ, იბანიესმა და სმოლინგმა კი ოსიმენის წინააღმდეგ, რომელიც ტოპფეხბურთელია, მაგრამ უნდა შეიცვალოს, რადგან თუ ინგლისში წავა და ასეთ დამოკიდებულებას გამოავლენს მოედანზე, იქ მოკლავენ. აქ იტალიაში უფრო მეტის უფლებას გაძლევენ. ოსიმენი დროგბას ჰგავს? მან დღეს შესანიშნავი გოლი გაიტანა და რომშიც მაგარი გოლი გაგვიტანა. დროგბას დონეზე თამაში შეუძლია, მაგრამ დროგბა არ “ყვინთავდა”. პირადადაც ვუთხარი, რომ სიმულაციას უნდა შეეშვას”.
კომენტარები post