კონფერენს ლიგის მეორე საკვალიფიკაციო ეტაპის პირველ მატჩში “საბურთალომ” “სტიაუას” უმასპინძლა და მეტოქე 1-0 დააამარცხა.
თბილისელთაგან მატჩის ერთადერთი გოლი ნონიკაშვილმა 41-ე წუთზე გაიტანა.
მატჩის შემდგომ გამართულ პრესკონფერენციაზე “საბურთალოს” მთავარმა მწვრთნელმა, ლაშა ნოზაძემ მედიის შეკითხვებს უპასუხა.
“პირველ რიგში გვერდში დგომისთვის მადლობას გიხდით. ფეხბურთელებს მინდა მოვუხადო მადლობა, ძალიან მაგარი ბიჭები არიან, ბევრი გამოცდილი ფეხბურთელი გვყავს და ბევრიც ახალგაზრდა. მადლობა მათ ამ თავდადებისთვის, დღევანდელი დასახული მიზანი გამარჯვება იყო და ვფიქრობ, რომ დამსახურებულად გავიმარჯვეთ. შეიძლება უფრო დიდი ანგარიშით გაგვემარჯვა, მაგრამ მათაც ჰქონდათ მომენტები. გუნდმა გამარჯვება დაიმსახურა, მაგრამ ეს მხოლოდ ნახევარი ნაბიჯია, წინ რთული ბრძოლა გვქონდა. გპირდებით, რომ ეს ბიჭები ბოლომდე იბრძოლებენ მომდევნო ეტაპზე გასასვლელად.
საბედნიეროდ ტრავმირებული ფეხბურთელი არ გვყავს, ეს უბრალოდ დაჭიმულობა იყო, მიკროტრავმების გარდა სერიოზული დაზიანება არავის აქვს. ვფიქრობ, რომ თქვენ დაინახეთ, რომ ამ გუნდს მაღალი მიზნებისთვის ბრძოლის ძალა შესწევს, რესურსი გვაქვს და ყველაფერი თამაშში გამოჩნდება.
მომავალ ცვლილებებზე ჯერ ვერ ვისაუბრებ, ზეგიდან ვარჯიშებს შევუდგებით და ნელ-ნელა დავიწყებთ ფიქრს შემადგენლობაზე.
“დინამო ბათუმის” მარცხი ჩემთვის ძალიან მოულოდნელი იყო, ტირანაში თამაშის დროსაც ვიცოდი, რომ დინამო თბილისი და დილა გავარდნილები იყვნენ, ბიჭებს ვუთხარი, რომ ჩვენი ქვეყნისთვის ახლა ჩვენ უნდა გვეთამაშა და მათ ბოლომდე იბრძოლეს. ქართული გუნდებიდან ჩვენ ვართ დარჩენილები, ვისაც შანსი აქვს ამ ბარიერის გადალახვის და ქართული ფეხბურთის პრესტიჟის დასაცავად ბოლომდე ვიბრძოლებთ.
მეტოქეს ძალიან მაღალი კლასის ფეხბურთელები ჰყავს, ყველანაირად ვეცდებით, რომ გარკვეული დაბნეულობის პრობლემები გამოვასწოროთ. შეტევაში სტუმრადაც თამამები ვიქნებით და შანსებიც გვექნება.
არ შეგვეშინდება არცერთი წამით, დანარჩენი მინდორზე გამოჩნდება.”– განაცხადა ნოზაძემ.
კომენტარები post