საფრანგეთის რანგით მეორე ჩემპიონატში ზურიკო დავითაშვილის დებიუტი შედგა, ქართველმა შემტევმა პირველი მატჩი “დიჟონის” წინააღმდეგ გამართა. დავითაშვილი ძირითად შემადგენლობაში იყო და 87-ე წუთზე გამარჯვების გოლიც გაიტანა, “ბორდომ” 2:1 გაიმარჯვა.
მატჩის შემდეგ “ბორდოს” მთავარმა მწვრთნელმა დავიდ გიონმა დავითაშვილის დებიუტი შეაფასა:
“ადვილი შესამჩნევია, რომ მას გამოცდილება აქვს. ტოპდონეზე რამდენიმე სეზონი უკვე ჩაატარა, პლუს ეროვნულ გუნდშიც გამოდის. დავინახეთ, რომ შეხვედრის ბოლოს მცირედით დაიღალა, მაგრამ საჭირო მომენტში ფეხი არ აუკანკალდა. გოლის ეპიზოდში სწორი გადაწყვეტილება მიიღო, იცოდა, რასაც აკეთებდა. ეს კი ეფექტიანობას გვმატებს. ზურიკოსგან მსგავსი თამაში ვარჯიშებზე უკვე ვნახეთ და ვიცით, შეტევის ფაზაში დავითაშვილი ტექნიკასა და სიზუსტეს გვმატებს. ვფიქრობ, ქართველის მოსვლა ბორდოსთვის ძალიან კარგი ამბავია.
წინა ფლანგზე სწრაფი და ტექნიკური მოთამაშეები გვყავს და გვინდა, კარგი მექანიზმი შევქმნათ, რაც ადვილი არ იქნება. რაც ზურიკოსთან დაკავშირებით ყველაზე მეტად მომეწონა, მის ხასიათზე მეტყველებს – ის არასდროს ნებდება. ყველაფრის მიუხედავად, ის ცდას არ აკლებდა. ერთხელ არ გამოუვიდა, მეორედ არ გამოუვიდა, თუმცა ბოლოს მიზანს მაინც მიაღწია. პირველ წუთებზეც ძალიან კარგი შანსი ჰქონდა, ბაპტის რენემ მაგარი ბურთი მოიგერია. დავითაშვილი ის მოთამაშეა, რომელიც საგოლე მომენტებს შექმნის და ეს ჩვენი შეტევისთვის უდიდესი მონაპოვარია”, – განაცხადა ფრანგმა სპეციალისტმა.
კომენტარები post