2022 წლის ევრობასკეტის A ჯგუფზე, რომელშიც საქართველოს ნაკრები მასპინძლის სტატუსით ითამაშებს, თურქეთის ეროვნული გუნდის მთავარმა მწვრთნელმა ერგინ ატამანმა ისაუბრა. როგორც ჩანს, 56 წლის სპეციალისტი მეტოქეებიდან ყველაზე მეტად ესპანეთს უფრთხის, შემდეგ კი – საქართველოს.
შეგახსენებთ, რომ ევროპის ჩემპიონატის A ჯგუფში საქართველოს, თურქეთისა და ესპანეთის გარდა, მონტენეგრო, ბელგია და ბულგარეთი ითამაშებენ.
“ფურცელზე ესპანეთი ყოველთვის ძლიერი გუნდია. რა თქმა უნდა, ესპანელებს აქვთ თავიანთი ხარვეზები, ჰყავთ ტრავმირებული მოთამაშეები, არის თაობათა ცვლის პროცესი. გამოჩნდება მათი ძალა. დაიწყეს ამხანაგური შეხვედრების გამართვა და ვაკვირდებით.
ძალიან საშიში გუნდია მასპინძელი საქართველო. ამ ტიპის ტურნირებში საკუთარი კედლების უპირატესობა ძალიან მნიშვნელოვანია. საქართველოს ნაკრებს ჰყავს შენგელია, ორი მოთამაშე NBA-დან, ჰყავს 5-6 ძალიან გამოცდილი კალათბურთელი. პირველ რიგში, ეს ორი ნაკრებია გამოსარჩევი, მაგრამ მათ გარდა არის კიდევ მონტენეგრო, ბელგია, ბულგარეთი და აუცილებელია კარგად თამაში, თორემ არავინ არაფერს გაპატიებს.
ევროპის ჩემპიოანტზე მატჩები ყოველ მეორე დღესაა, ზოგიერთი თამაში საღამოსაა, ზოგი – დღისით. ამიტომ, თითოეული შეხვედრისთვის ფიზიკურად და მორალურად მზად უნდა ვიყოთ”, – განაცხადა ერგინ ატამანმა.
კომენტარები post