საქართველოს საკალათბურთო ნაკრები სლოვენიაში, კურორტ როგლაზე მსოფლიო ჩემპიონატის საკვალიფიკაციო ეტაპისა და ეურობასკეტისთვის მზადებას განაგრძობს.
ვარჯიშები აქტიურ ფაზაში შევიდა. ილიას ზუროსი ასისტენტებთან ერთად ბევრ დრო კომბინაციების გათამაშებას, ძირითადად დაცვითი ტაქტიკის დამუშავებას უთმობს. ფიზმომზადების მწვრთნელიც საკუთარ გეგმას მიჰყვება და მოძლიერებული მოთამაშეების უფრო მაღალ ფიზიკურ კონდიციამდე აყვანას ცდილობს.
2 დღეა, ნაკრებს შეუერთდა სანდრო მამუკელაშვილი, რომელსაც გუნდთან სრულფასოვანი ვარჯიშის უფლება NBA-ის რეგულაციების გათვალისწინებით 4 აგვისტოდან აქვს.
საქართველოს ნაკრების ლიდერებმა თორნიკე შენგელიამ, გიორგი ცინცაძემ და სანდრო მამუკელაშვილმა.
“ჩვენი შეკრება საკმაოდ კარგად მიმდინარეობს. კარგად ვემზადებით, როგორც ფიზიკურად, ისე ტაქტიკურად და მჯერა, რომ შეკრების მეორე ნახევარი უფრო პროდუქტიული იქნება”,- განაცხადა შენგელიამ.
“გუნდი თითქმის 1 კვირაა შეკრებაზეა, რამდენიმე დღე თბილისში ვვარჯიშობდით და ახლა უკვე სლოვენიაში გადავინაცვლეთ. ყველა ძალიან მონდომებულია, ახალგაზრდებიც და ვეტერანებიც. თითოეულმა ჩვენგანმა იცის, რომ აქ საერთო მიზნისთვის ვართ და მაქსიმუმს ვაკეთებთ. ახლოვდება ამხანაგური მატჩებიც, რაც ძალიან მნიშვნელოვანი იქნება, რათა მწვრთნელის კონკრეტული მონახაზები და დავალებები ყველამ გავითავისოთ. ეს მატჩები პირადად ჩემთვისაც ძალიან მნიშვნელოვანია, რადგან საკმაოდ რთული ტრავმის გამო 1 წელია პარკეტზე არ გამოვსულვარ და ახლა ვბრუნდები. იმედი მაქვს, შევალ ისეთ ფორმაში, რომ ევროპის ჩემპიონატისთვის მზად ვიყო და გუნდს 100%-ით დავეხმარო”,– განაცხადა ცინცაძემ.
“მეორე დღეა ბიჭებთან ერთად როგლაში ვართ. ძალიან კარგად მიდის ვარჯიშები. რა თქმა უნდა, NBA-ს რეგულაციების გამო ფიზიკურ კონტაქტს ვერიდები. ჩემი მწვრთნელი არის ჩემთან ერთად და ნაკრებიც ხელს მიწყობს. დარბაზში ადრე მოვდივარ, ვვარჯიშობ სროლებზე, ვეგუები ბიჭებს, რათა შევიკრათ და ერთი გუნდი ვიყოთ”,– განაცხადა მამუკელაშვილმა.
კომენტარები post