UFC-ის ქართველი მებრძოლი მერაბ დვალიშვილი უკმაყოფილო დარჩა იმის გამო, რომ ახლახან სოლტ ლეიკ სიტიში გამართული ბრძოლის დროს, ოქტაგონზე საქართველოს დროშის თანხლებით გასვლის უფლება არ მისცეს.
31 წლის სპორტსმენმა ტურნირში UFC 278 ბრაზილიელი ლეგენდა ჟოზე ალდო დაამარცხა და სუპერმსუბუქი წონის რეიტინგის სამეულში შევიდა, რაც მას სატიტულო ბრძოლისკენ გზას უხსნის.
“რატომ არ შეგვიძლია ოქტაგონზე ჩვენი დროშებით გამოსვლა? სპორტის ამ სახეობაში იმისთვის მოვედი, რომ ჩემი ქვეყანა საერთაშორისო ასპარეზზე მესახელებინა. მე ეს შევძელი, მაგრამ არ შემიძლია ჩემი დროშის გამოფენა? მსურს ადამიანებს ვაჩვენო, რომ მე პატარა ქვეყნიდან ვარ და ამასთან, ქართველებმა იამაყონ ჩემით. რატომ არ შეიძლება წარმოვადგინო ჩემი ქვეყანა?
მიზეზს არავინ ხსნის. ეს ჩემთვის ძალიან მნიშვნელოვანია. აშშ-ში არაფრით მოვედი და ჩემი მწვრთნელები და გუნდი დამეხმარა გავმხდარიყავი ის, ვინც ვარ. ახლა ორ ქვეყანას წარმოვადგენ და ორივე დროშით ვამაყობ. მიყვარს ამერიკა და მიყვარს საქართველო”, – განაცხადა მერაბმა.
კომენტარები post