საქართველოს ლეგენდარული ფეხბურთელი ვლადიმერ გუცაევი იაგო ხვიჩიას საავტორო გადაცემაში (საქართველოს დაბადება) იმყოფებოდა სტუმრად, სადაც “რეალ მადრიდში” ჩაშლილ ტრანსფერზე ისაუბრა.
“ამხანაგური ტურნირებიდან ყველაზე პრესტიჟული მადრიდის ტურნირი იყო, რომელიც სანტიაგო ბერნაბეუს სახელს ატარებდა. “სამეფო კლუბი” ყველა ფეხბურთელის ოცნება იყო, ამაზე მაღალი დონე უბრალოდ არ არსებობდა.
ტურნირი რომ მორჩა, თარჯიმანმა მითხრა, რაღაც პრიზი უნდა გადმოგცენო. თავიდან გამიკვირდა, არ დავიჯერე, თუმცა ოთახში ასულს ტურნირის საუკეთესო ფეხბურთელის ტიტული გადმომცეს.
სასტუმროში ჟურნალისტებმა პრესკონფერენცია გამართეს, ხოლო სასტუმროში, სადაც ჩვენთან ერთად მიუნხენის “ბაიერნი” იყო, მედიის წარმომადგენლებმა მხოლოდ მე და რამაზ შენგელია დაგვიბარეს.
სასტუმროში “რეალის” წარმომადგენლებსაც შევხვდი, შეხვედრას ნოდარ ახალკაცი და KGB-ს წარმომადგენლებიც ესწრებოდნენ. შეხვედრის შემდეგ თარჯიმანმა მითხრა, “რეალი” კონტრაქტს გთავაზობდა, მხოლოდ ხელის მოწერა აკლდა, მაგრამ თქვენებმა უარი უთხრესო. ეს ლეგენდა არაა, ნამდვილი ამბავია”, – განაცხადა გუცაევმა.
კომენტარები post