ძიუდოს საერთაშორისო ფედერაციის აღმასრულებელი კომიტეტის გადაწყვეტილებით, რუსი და ბელარუსი სპორტსმენები ძიუდოს საერთაშორისო ფედერაციის ტურნირებზე მიიღებენ მონაწილეობას, მათ შორის მსოფლიო ჩემპიონატზეც, რომელიც 7-14 მაისს კატარში გაიმართება.
ცოტა ხნის წინ უკრაინის ძიუდოისტთა ნაკრების მთავარმა მწვრთნელმა, ვიტალი დუბროვამ განაცხადა, რომ ისინი ამ ტურნირს ბოიკოტს გამოუცხადებენ, მიზეზი კი რუსი და ბელარუსი სპორტსმენების დაშვებაა. ამის შესახებ სოციალურ ქსელში პოსტი გამოაქვეყნა ახალგაზრდა უკრაინელმა ძიუდოისტმა, დარია ბილოდიდმა, რომელიც აღნიშნავს, რომ ტურნირზე ისეთი ძიუდოისტები მიიღებენ მონაწილეობას, რომლებსაც კონტრაქტი აქვთ რუსეთის ან ბელარუსის შეიარაღებულ ძალებთან.
“ერთ კვირაში კატარში მსოფლიო ჩემპიონატი იწყება, რომლისთვისაც უკრაინის ნაკრები ემზადებოდა და წასვლას აპირებდა. ტურნირზე რეგისტრაციის ბოლო დღეს კი, საერთაშორისო ვებ-გვერდზე, ტერორისტული ქვეყნის, რუსეთის წარმომადგენლების განაცხადებიც გამოჩნდა. მაგრამ ეს არ არის ყველაზე საინტერესო. ცოტა ხნის წინ, საერთაშორისო ოლიმპიურმა კომიტეტმა რეკომენდაციებით მიმართა საერთაშორისო სპორტულ ფედერაციებს, სადაც გარკვევით ეწერა, რომელ სპორტსმენებს არ უნდა მიეღოთ მონაწილეობა ტურნირებზე. ესენი არიან სპორტსმენები, რომლებსაც კონტრაქტი აქვთ რუსეთის ან ბელარუსის შეიარაღებულ ძალებთან და შინაგან საქმეთა სამინისტროსთან, მაგრამ ყველა, ვინც მსოფლიო ჩემპიონატზე მიიღებს მონაწილეობას, სამხედრო პერსონალია. ეს ნონსენსია. ვფიქრობ, მიუღებელია, საერთაშორისო ტურნირებზე ისეთი სამხედრო პერსონალის დაშვება, რომელთა ტერორისტული ქვეყანაც უკრაინელებს ყოველდღე კლავს”, – წერს დარია ბილოდიდი.
კომენტარები post