დღეს, საქართველოს საკალათბურთო ნაკრები მსოფლიო ჩემპიონატის მეორე საკვალიფიკაციო ეტაპის ეგიდით ნიდერლანდების ნაკრებს უმასპინძლებს. მატჩი თბილისში, 19:00 საათზე გაიმართება.
საქართველომ პირველ საკვალიფიკაციო ეტაპზე 2 გამარჯვება მოიპოვა, რითაც მუნდიალზე მოხვედრის საკმაოდ რეალური შანსი მიიღო. ახლა საქართველოს ჯგუფში მე-4 პოზიციას იკავებს და ჩვენ იტალია, ესპანეთი და ისლანდია 3-3 გამარჯვებებით გვისწრებენ.
საქართველოს ნაკრები აღარ დაუპირისპირდება უკრაინას და ესპანეთს, რადგანაც მათ პირველ საკვალიფიკაციო ეტაპზე ვეთამაშეთ. შესაბამისად, წინ გველის 2-2 დაპირისპირება იტალიასთან, ისლანდიასთან და ჯგუფის აუთსაიდერ ნიდერლანდებთან.
ჩვენს ნაკრებს 6-დან 4 გამარჯვება ესაჭიროება, რათა მსოფლიო ჩემპიონატზე მოხვდეს. მუნდიალზე ჯგუფიდან მხოლოდ 3 გუნდი გავა.
საქართველოს ნაკრებს დაუბრუნდა გოგა ბითაძე და დიდი ალბათობით ის დღეს გარკვეულ სათამაშო წუთებს მიიღებს. ასევე ითამაშებს მეორე NBA-ის კალათბურთელი სანდრო მამუკელაშვილიც, რომელმაც გუნთან ერთად თამაშის გამოცდილება აკროპოლისის თასზე მიიღო და თამაშიდან თამაშამდე იზრდებოდა.
შესაბამისად, დღეს საქართველოს ნაკრები შეეცდება 7 მატჩიანი წაგებათა სერია შეწყვიტოს. დღეს გამარჯვება აუცილებელია, რათა მსოფლიო ჩემპიონატზე გასვლის შანსები შევინარჩუნოთ.
კომენტარები post