“საქართველოს ნაკრებს ერთ-ერთი უძლიერესი წინა ხაზი ეყოლება” – ფიბა-მ ეურობასკეტის წინ რეიტინგი გამოაქვეყნა

ევრობასკეტი 2022-ის დაწყებამდე ზუსტად 1 თვით ადრე, ფიბა-ევროპამ მომავალი ტურნირის მონაწილეთა რეიტინგი გამოაქვეყნა. კლასიფიკაციას არავითარი კავშირი არ აქვს ფიბა-ს ოფიციალურ რეიტინგთან, თუმცა, მომავალი შეჯიბრის წინ, ძალთა გადანაწილების კუთხით მაინც საინტერესო უნდა იყოს.

ფიბა-ს ჟურნალისტების აზრით, საქართველოს ნაკრები ტურნირში მონაწილე 24 ქვეყნიდან მე-14 პოზიციას იკავებს და ჯგუფიდან გასვლას და მერვედფინალში თამაშს უწინასწარმეტყველებენ.

“საქართველო იმ ნაკრებთა სიაშია, რომელთაც ამჯერად თამაში მშობლიურ გარემოში მოუწევთ. ევრობასკეტისთვის აშენებული ახალი არენა დიდი ზურგი უნდა იყოს ქართველი კალათბურთელებისთვის, რომელთაც გასულ თვეში ესპანეთთან მატჩში მნიშვნელოვანი მოგების გემო შეიგრძვნეს, თუმცა, იმავე მეტოქესთან ჯგუფურ ეტაპზე თამაშს კიდევ უფრო დიდი დატვირთვა ექნება. საქართველოს ნაკრებს ერთ-ერთი უძლიერესი წინა ხაზი ეყოლება, მას შემდეგ, რაც თორნიკე შენგელია-გიორგი შერმადინის დუეტს გოგა ბითაძე შეუერთდება”, – ვკითხულობთ ფიბა-ს ოფიციალურ ვებ-გვერდზე.

აღნიშნულ რეიტინგში ილიას ზუროსის შეგირდები ისეთ სოლიდურ ნაკრებებს უსწრებენ, როგორებიც უკრაინა, მონტენეგრო, ბოსნია-ჰერცეგოვინა და პოლონეთი არიან, უკან არიან ჩვენი ჯგუფის სხვა წევრები ბელგია და ბულგარეთიც, სამაგიეროდ, ჩამოვრჩებით ხსენებულ ესპანეთსა და თურქეთს. სრულად, კლასიფიკაცია ასე გამოიყურება:

1. სლოვენია, 2. საფრანგეთი, 3. საბერძნეთი, 4. სერბეთი, 5. ლიეტუვა, 6. ესპანეთი, 7. თურქეთი, 8. იტალია, 9. გერმანია, 10. ჩეხეთი, 11. ხორვატია, 12. ფინეთი, 13. ისრაელი, 14. საქართველო, 15. პოლონეთი, 16. ბოსნია-ჰერცეგოვინა, 17. მონტენეგრო, 18. ბელგია, 19. უკრაინა, 20. დიდი ბრიტანეთი, 21. უნგრეთი, 22. ბულგარეთი, 23. ესტონეთი, 24. ნიდერლანდები.