2022/2023 წლების სეზონი შესანიშნავად დაიწყო ბუდუ ზივზივაძემ, ქართველი ფეხბურთელის ანგარიშზე 6 მატჩში 6 გოლია და რა თქმა უნდა ის ამაზე გაჩერებას არ აპირებს. “ფეჰერვარის” ბომბარდირმა ინტერვიუ მისცა უნგრულ მედიას:
“ხუთშაბათს საღამოს გამართული მატჩი ჩემთვის ბევრს ნიშნავდა. ფეჰერვარის მოთამაშის რანგში ეს ჩემი პირველი დუბლი იყო და რა თქმა უნდა, ძალიან ბედნიერი ვარ. იმედი მაქვს, ეს დუბლი პირველი და უკანასკნელი არ იქნება. ამის მჯერა, რადგან თანაგუნდელებისგან დიდ მხარდაჭერას ვგრძნობ და კარგი გუნდის ნაწილი. ეს პეტროკუბთანაც გამოჩნდა. დაცვა კარგად მოქმედებდა, ჩვენი შეტევის ხაზი კი ეფექტური იყო.
მოლდოვაში დამსახურებულად მოვიგეთ, მაგრამ უკვე პარასკევს იმაზე ფიქრით გავიღვიძეთ, რომ ეს თამაში წარსული იყო და კვირას კიდევ ერთი სერიოზული გამოცდა გველის. ფერენცვაროშს ვეთამაშებით და ვფიქრობ, არ არის საჭირო იმის ახსნა, თუ რაოდენ რთული მატჩი გველოდება. კიდევ ოთხი დღის შემდეგ პლეი ოფის შეხვედრა გვიწევს კიოლნთან. რას ვიზამთ, შებრალება არავისგან გვჭირდება, ეს ის მატჩებია, რომლებსაც ყველა ფეხბურთელი მოუთმენლად ველოდებით.
ჩემპიონატის გათვალისწინებთ, სეზონის 6 მატჩში 6 გოლი გავიტანე, რაც იმაზე მეტია, ვიდრე ვვარაუდობდი. ბოლო რამდენიმე კვირის განმავლობაში ბევრს ვმუშაობდი, რათა კარგ ფორმაში ვყოფილიყავი. საიდუმლო არავისთვისაა, რომ მინდა იგივე კვირასაც გავაგრძელო, რაც ხუთშაბათს დავიწყე, თუმცა ისიც კარგად ვიცი, რომ ფერენცვაროში გაცილებით ძლიერი გუნდია, ვიდრე პეტროკუბი იყო. აღარაფერს ვამბობ კიოლნზე. თანაც ამ ორივე მატჩის ჩატარება სტუმრად, აუცილებლად ანშლაგის პირობებში მოგვიწევს.
საშიში არაფერია, ფეხბურთელს ჟინი მხოლოდ ემატება, როდესაც გადაჭედილი სტადიონის მინდორზე გადის. ფერენცვაროშის წინააღმდეგ სათამაშოდ მხოლოდ მოგების წყურვილით გავალთ და ბოლო ამოსუნთქვამდე ვიბრძოლებთ. ეს დიდი მატჩი იქნება. სამი ქულა მნიშვნელოვანია როგორც ფერენცვაროშისთვის, ისე – ჩვენთვის.
თითოეულ თამაშში გამარჯვება გვწადია. შესაძლოა ისე მოხდეს, რომ საბოლოო ჯამში გამარჯვებულები ვერ გამოვიდეთ, მაგრამ შემიძლია პირობა მოგცეთ, რომ იმავე კიოლთან წარმატებისთვის ყველაფერს გავაკეთებთ. რა თქმა უნდა, ვიცით, რომ ფავორიტები არ ვართ მსოფლიოს ერთ-ერთი უძლიერესი ლიგის – ბუნდესლიგის გუნდთან დაპირისპირებაში, მაგრამ ფეხბურთში სასიამოვნო სწორედ ის არის, რომ საბოლოო შედეგი არა ფურცელზე, არამედ მოედანზე განისაზღვრება, იქ კი ყველაფერი შეიძლება მოხდეს”,– განაცხადა ზივზივაძემ.
კომენტარები post