საკალათბურთო ჩემპიონთა ლიგაზე მეორე ჯგუფური ეტაპი გრძელდება. გიორგი შერმადინის ტენერიფემ, რომელიც ტურნირის მოქმედი გამარჯვებულია, ესპანურ ბილბაოს უმასპინძლა და 12 ქულით მოუგო – 78:66. ტენერიფემ პირველი ტაიმი 4 ქულით მოიგო, ხოლო გადამწყვეტი უპირატესობა მესამე პერიოდში მოიპოვა, როდესაც მეტოქეს 13 ქულით გაუსწრო.
გიორგი შერმადინმა პარკეტზე 27:12 წუთი გაატარა, რა დროშიც 22 ქულა, 7 მოხსნა და 1 პასი დააგროვა. გიორგიმ 14-დან 10 ორქულიანი და 3-დან 2 საჯარიმო ჩააგდო. გიორგი მატჩის MVP გახდა. შერმადინი MVP-ის ტიტულს ჩემპიონთა ლიგის მეორე ჯგუფური ეტაპის 3 მატჩიდან ორში დაეუფლა.
გიორგის გუნდი საოცარ ფორმაშია და ჩემპიონთა ლიგის ჯგუფს 6 ქულით ლიდერობს. ჩემპიონთა ლიგის გათამაშება მარტში განახლდება, ტენერიფე ამჯერად ბილბაოს ესტუმრება. შეგახსენებთ, რომ თურქეთში მომხდარი ტრაგედიის გამო, რატი ანდრონიკაშვილისა და თად მაკფადენის მურსიას მატჩი დარუშაფაქასთან გადაიდო.
კომენტარები post