ხვალ “საბურთალო” რუმინეთში “სტიაუას” ესტუმრება და გუნდები ერთმანეთში კონფერენს ლიგის მესამე საკვალიფიკაციო ეტაპზე გამსვლელის ვინაობას გაარკვევენ.
პირველ მატჩში “სტიაუას” პრეზიდენტმა მარცხი ვერ აიტანა და ანტონ პეტრეასთან თანამშრომლობა შეწყვიტა, მის მაგივრად კი ნიკოლაე დიკა დაინიშნა, რომელიც კლუბს 2017-2018 წლებში ედგა სათავეში. “საბურთალოსთან” მატჩამდე დიკამ პრესკონფერენცია გამართა და მედიის შეკითხვებს უპასუხა.
“ხალხი ყოველთვის ამბობს, რომ მწვრთნელები გუნდებში ფულის გამო მიდიან, მაგრამ მე პირველ რიგში ფულს არ ვაყენებ. ასე მივაღწიე წარმატებას, როგორც ფეხბურთელმა. მთავარი მიზნების მიღწევაა. მე ვესაუბრე კლუბის პრეზიდენტს და საერთო ენა გამოვნახეთ. კომუნიკაბელური ადამიანი ვარ, მიყვარს სხვების იდეების მოსმენა.
პრეზიდენტმა მითხრა, რომ საბურთალოსთან მატჩის შემდეგ ფლორინ ტანასე გუნდიდან წავა, ეს წუხელ გავიგე. ჩვენ მნიშვნელოვან მოთამაშეს ვკარგავთ, გუნდის კაპიტანს და ბოლო ორი სეზონის საუკეთესო ბომბარდირს. ტანასესთანაც მქონდა საუბარი, რაღაცები გავარკიეთ. მე არ ვარ ის ადამიანი, ვინც სხვას მეორე შანსს არ აძლევს.
ორი დღე მაქვს საბურთალოსთან მატჩისთვის გუნდის მოსამზადებლად. ძალიან რთული შეხვედრა იქნება, კარგ გუნდს ვეთამაშებით, მაგრამ მომდევნო ეტაპზე გასვლის უნდა გვჯეროდეს. გუნდში ორი ვარჯიში უკვე ჩავატარე. ვფიქრობ, შეგვიძლია შარშანდელზე უკეთ თამაში. თუმცა, ახლა ძალიან მნიშვნელოვანია, რომ კონფერენსლიგის მომდევნო ეტაპზე გავიდეთ”, – განაცხადა დიკამ.
კომენტარები post