La Gazzetta dello Sport-ის ცნობილმა იტალიელმა ჟურნალისტმა მაურიციო ნიჩიტამ დიმაროში (ადგილი სადაც “ნაპოლი” წინა-სასეზონო შეკრებას გადის) რამდენიმე დღე გაატარა და ხვიჩა კვარაცხელიას დააკვირდა. მან ჟურნალში კვარას შესახებ ვრცელი სტატია გამოაქვეყნა და აღნიშნა, რომ ხვიჩას გუნდის ლიდერად ჩამოყალიბებისთვის ყველაფერი აქვს.
“თავიდანვე უნდა ვთქვა, რომ მისი გვარის გამოთქმაში საკმაოდ გავიწაფეთ: კვა-რაც-კელია! ხედავთ, საქმე არც ისე ცუდადაა, თუმცა, სიმარტივისთვის ხვიჩას გვარი უკვე შევამოკლეთ. ჟურნალისტებისა და ქომაგებისთვის ის უბრალოდ კვარაა.
მის შესახებ ჩამოსვლამდე იმდენი იწერებოდა, რომ აქ უკვე დიდი აჟიოტაჟი ელოდა. ახალბედა ძალიან თბილად მიიღეს. კვარაცხელიაზე დიდ იმედებს ამყარებენ, მითუმეტეს იმ ფონზე, რომ ნაპოლი რამდენიმე საკვანძო ფეხბურთელმა დატოვა. გასაკვირი არ ყოფილა, რომ ვარჯიშებსა და ამხანაგურ მატჩებში მის გამოჩენას მოუთმენლად ელოდნენ. მასაც იმედები არ გაუცრუებია და პირველივე თამაშებში გაიტანა. ცხადია, ეს ყველაფერი მაშინვე ხვდებოდა ინტერნეტში, ამდენად, ქომაგები დარწმუნდნენ, რომ მართლაც დიდი ტალანტი მიიღეს.
აღნიშნული მე მანამდეც ვიცოდი, ერთმა რამ კი სასიამოვნოდ გამაოცა: ეს ახალგაზრდა ფეხბურთელი თავის საქმეს უდიდესი პასუხისმგებლობით უდგება. თვალსაჩინოა, რომ მაქსიმალურად კონცენტრირებულია და სავწრთნელ პროცესშიც ბოლომდე იხარჯება. მისთვის ჯერ არ შემიმჩნევია მცირე მოდუნებაც კი, რაც იმედისმომცემ ფეხბურთელებს ახასიათებთ. ხვიჩას გულით უნდა დაამტკიცოს, რომ ტალანტის გარდა, შრომისმოყვარეობა და დისციპლინაც გააჩნია.
დავინახე ისიც, რომ ქართველ ფეხბურთელს გუნდში რაც შეიძლება მალე ადაპტირება სურს და მუდმივი კონტაქტი აქვს სამწვრთნელო შტაბის წარმომადგენლებთან და პარტნიორებთან. რაც დავაკვირდი, თანაგუნდელებს ინგლისურად ესაუბრება, თუმცა, პრობლემატური არც იტალიურის სწავლა უნდა იყოს. ვუსურვებ, ეს, რაც შეიძლება მალე გააკეთოს, რადგანაც იტალიური ენის ცოდნა ნეაპოლში ცხოვრებაში ძალიან დაეხმარება.
“პერუჯასთან” გოლზე გამორჩეულად უნდა ითქვას. ის მართლაც კარგი გამოვიდა. ბურთი ოსიმჰენთან გაითამაშა და ოსტატურად დაარტყა. ნეაპოლში იმედი აქვთ, რომ ეს დუეტი თავს ოფიციალურ მატჩებშიც კარგად წარმოაჩენს. სხვათა შორის, ამჟამინდელი “პერუჯა” სუსტი კლუბი ნამდვილად არაა და სერია B-ში ერთ-ერთი საუკეთესოა.
კიდევ ერთს ვიტყვი: კვარაცხელიას ის გოლი ვარჯიშების გამოძახილი მგონია. ნამდვილად არ მინახავს ბევრი ფეხბურთელი, ვინც კარში ასე ზუსტად ურტყამს. პირიქით, არაერთია. გვარებს არ დავასახელებ, თუმცა, ისინი ფანტასტიკურ დარტყმებ ისეთებს მოაყოლებენ ხოლმე, რომ ბურთი ღრუბლებში მიფრინავს. აი, კვარაცხელია კი საოცარ სტაბილურობას აჩვენებს: ბურთი ან კარში ხვდება ანაც ძელებთან ახლოს მიდის. ეს ძალიან ფასეული უნარია.
ბევრი რამ იქნება დამოკიდებული ლუჩიანო სპალეტიზეც, თუმცა, მჯერა, რომ ის ქართველ ფეხბურთელთან კარგად იმუშავებს. რისკი, რომ ახალწვეულზე დიდმა ზეწოლამ ცუდად იმოქმედოს, ნამდვილად არსებობს. როდესაც სერია A-ში მოდიხარ და თანაც არცთუ მშვიდ ნეაპოლში, ამდენი კომპლიმენტების ფონზე, უკუსვლას აღარ გაპატიებენ. პირიქით, მეტი უნდა იმუშავო. გულწრფელად ვუსურვებ კვარას, რომ ყველაფერი გამოუვიდეს. ამ დროისთვის ის ნამდვილად ტოვებს დიდი ტალანტის შთაბეჭდილებას, რომელსაც ისიც კარგად ესმის, რომ იტალიაში წარმატებისთვის დიდი შრომაა საჭირო”,– დაწერა ნიჩიტამ.
კომენტარები post