35 წლის ქართველმა სუმოისტმა ლევან გორგაძემ, რომელსაც ტოჩინოშინის შიკონათი ვიცნობთ, მისთვის საიუბილეო, რიგით მე-100 ბაშო მოგებით გახსნა.
ტოჩინოშინი იაპონიის დედაქალაქ ტოკიოს “რიოგოკუ კოკუგიკანში” დაწყებულ 2023 წლის პირველ სუპერტურნირში დასავლეთის მე-11 მაეგაშირას წოდებით ჩაება.
ქართველი ვეტერანი აღმოსავლეთის მე-11 მაეგაშირას ტიტულის მქონე ჩიიოშომას გაეჯიბრა, რომელთან ურთიერთშეხვედრებშიც 3:5 მარცხდებოდა, ამჯერად კი, წარმატებულად გაისარჯა.
31 წლის მონღოლთან დაპირისპირება თითქმის ერთ წუთს გაგრძელდა და იმით დასრულდა, რომ ტოჩინოშინმა მოწინააღმდეგე დოჰიოდან იორიკირით გაიყვანა.
ცნობილია, რომ ჰაცუ ბაშოს მე-2 დღეს ქართველი სუმოისტის მეტოქე დასავლეთის მე-10 მაეგაშირა ჰირადოუმი იქნება. ლევანი 22 წლის იაპონელს კარიერის განმავლობაში მხოლოდ ერთხელ შეხვედრია და გასულ წლის სექტემბერში იორიკირით აქვს წაგებული.
კომენტარები post