ზურიკო დავითაშვილის ბორდო საფრანგეთის ლიგა 2-ის ბოლო ტურში შინ სატურნირო ცხრილის ლიდერ ლე ავრთან დამარცხდა (1:2). მასპინძელთა ქართველი შემტევი, მართალია, შედეგიანი მოქმედებით არ გამორჩეულა, მაგრამ ზურიკომ გულშემატკივრებისა და მეტოქე გუნდის მწვრთნელისგან აღიარება მაინც დაიმსახურა.
21 წლის ქართველმა გარემარბმა ბორდოს სასტარტო შემადგენლობაში ითამაშა და 75-ე წუთზე შეცვალეს. თამაშის შემდეგ WebGirodins-მა თავის მკითხველებში ტრადიციული გამოკითხვა ჩაატარა. შედეგად, ბორდოს საუკეთესო მოთამაშედ ზურიკო დავითაშვილი დასახელდა, რომელმაც ხმების 47% მიიღო და დიდი უპირატესობით აჯობა მეორე-მესამე ადგილებზე გასულ ნსიმბასა (14%) და ბოკელეს (11%).
ზურიკო გამოარჩია ლე ავრის მთავარმა მწვრთნელმა ლუკა ელსნერმაც. საიტი Foot-National ყოველი ტურის შემდეგ, გუნდების მთავარ მწვრთნელებს მეტოქე გუნდში გამორჩეულ მოთამაშეებს ასახელებინებს. ლე ავრის სლოვენიელმა თავკაცმაც თავისი არჩევანი ბორდოს ქართველ შემტევზე გააკეთა.
საფრანგეთის ლიგა 2-ში ჩატარებული 21 ტურის შემდეგ, ბორდოს 36 ქულა აქვს და მეორე-მესამე ადგილებს სოშოსთან იყოფს. ლიდერ ლე ავრს 46 ქულა აქვს. ზურიკო დავითაშვილის გუნდი მომდევნო მატჩს 3 თებერვალს, სტუმრად პოსთან ჩაატარებს.
კომენტარები post