საქართველოს საკალათბურთო ნაკრებმა მსოფლიოს 2023 წლის ჩემპიონატის შესარჩევი ეტაპის პირველი ჯგუფური ეტაპის მეხუთე ტურში უკრაინასთან 66:79 წააგო და მუნდიალზე მოხვედრის საკითხი ძალიან გაირთულა.
მატჩის შემდეგ საქართველოს ნაკრების მთავარმა მწვრთნელმა ილიას ზუროსმა კომენტარი გააკეთა.
“უკრაინამ მოგება დაიმსახურა და მათ ამას ვულოცავ, დღეს უკეთ ითამაშეს. სამწუხაროდ, ძალიან ცუდი მატჩი გვქონდა, კონცენტრაცია დაგვაკლდა, ბევრი შეცდომა დავუშვით, როგორც შეტევაში, ისე – დაცვაში. იყო სხვა მიზეზებიც, რამაც ხელი შეგვიშალა. სამწუხაროდ, თამაშის წინ დაგვაკლდა ერთი კალათბურთელი.”
“მინდა, მადლობა გადავუხადო ჩვენს გულშემატკივრებს, რომლებიც პირველიდან ბოლო წამამდე მხარს გვიჭერდნენ. დღეს ცუდი თამაში გვქონდა, მაგრამ ეს ერთი თამაში იყო. კალათბურთი ასეთია – კარგი მომენტებიც არის და ცუდიც. არ უნდა გავჩერდეთ, ერთად დგომას, მუშაობას და ბრძოლას ვაგრძელებთ. ბითაძემ მატჩის წინ გახურებისას ფეხი იტკინა, თავს კარგად არ გრძნობდა და გამომდინარე იქიდან, რომ წინ გრძელი ზაფხული გველის, მისი დასვენება გადავწყვიტეთ, რისკზე არ წავედით. ვიმედოვნებ, რომ სერიოზული არაფერია და ესპანეთთან ჩვენთან ერთად იქნება”, – განაცხადა ილიას ზუროსმა.
კომენტარები post